Aruba Birdlife Conservation: Gobierno mester aplica su propio reglanan pa UTV

ORANJESTAD — Aruba Birdlife Conservation (ABC) a pidi Corte pa obliga Land Aruba y Aruba Conservation Foundation (ACF) tuma medidanan concreto pa proteha areanan di naturalesa contra trafico motorisa. Durante e tratamento di e caso UTV y ATV diahuebs, abogado Geert Rep (ABC) a argumenta cu Gobierno no ta aplica su propio maneho y cu e dialogo di ultimo lunanan no a produci un solucion aceptabel. “Tin un situacion ilegal cu ta continua,” Rep a declara, splicando pakico, segun ABC, intervencion urgente di huez ta necesario. El a mantene cu medidanan inicial cu Gobierno a tuma, incluyendo colocacion di piedranan grandi pa blokea acceso, no a wordo sigui pa suficiente control y accion.

TERA CORA TA PUNTO CENTRAL

Un parti importante di e argumento di Rep a concentra riba e deseo di Gobierno pa permiti touroperadornan cruza Tera Cora. Segun e abogado, durante e reunionnan no a wordo splica pakico ta necesario pa usa precisamente e area aki, mientras tin rutanan alternativo via camindanan existente. Rep a referi na un informe di 2022 y un conseho conjunto di DOW, DIP y DNM di 24 di september 2026. Segun e, e documentonan ta identifica zonanan cu mester keda cera pa actividadnan motorisa y ta sostene proteccion di Tera Cora. E abogado a cuestiona pakico Gobierno ta sigui busca un apertura di e area, apesar di e consehonan di su propio departamentonan. Manera Noticiacla a informa anteriormente, ABC ya a pidi Gobierno pa splica cu argumentonan tecnico y legal si e kier desvia di e recomendacionnan existente. 

DIALOGO NO A TRECE ACUERDO

Rep a presenta un resumen di e contacto entre ABC, Gobierno y touroperadornan. Segun e, despues di e colocacion inicial di barreranan na mei, e continuacion di e medidanan y e comunicacion no a desaroya manera tabata spera. El a indica cu ABC a participa den reunionnan cu representantenan di touroperadornan na november y a presenta un proposicion dia 6 di november, cu despues a wordo amplia dia 8 di november. Segun Rep, ABC tabata dispuesto pa discuti un apertura temporal bou di condicionnan, mientras ta warda un estudio di impacto ambiental. Pero e conversacionnan no a produci suficiente garantia pa proteccion di e area. “Esfuersonan a wordo haci, pero no tin un perspectiva cla cu e partidonan lo haya un solucion aceptabel,” Rep a declara. P’esey, segun e, ta necesario pa Corte sigui atende e caso y tuma un decision.

ACCESO LIMITA BOU DI CONDICIONNAN

Rep a aclara cu e posicion di ABC no ta un rechazo general di tur actividad turistico den e region. E organisacion ta dispuesto pa acepta cierto trafico motorisa riba rutanan specifico, temporalmente y bou di condicionnan estricto. E condicionnan menciona ta inclui horario, velocidad, cantidad maximo di vehiculo, reduccion gradual di actividad y control efectivo di e cumplimento cu reglanan. Segun Rep, e problema no ta limita na e empresanan formal cu ta participa den e caso. El a señala tambe actividad di operadornan cu ta organisa tour sin opera como un touroperador oficial y cu, segun e, ta cruza e terreno sin suficiente respeto pa naturalesa. E abogado a enfatisa cu reglanan riba papel no ta suficiente si no tin control. “Nan ta pensa algo, pero despues no ta aplica e reglanan,” el a declara.

PIEDRANAN, CONTROL Y MULTA

ABC ta pidi barreranan fisico, incluyendo piedranan grandi of eventualmente un sero, pa limita acceso na e areanan cu mester keda protehi. Pero Rep a subraya cu coloca e barreranan solamente no ta suficiente: mester vigila cu nan no wordo kita y cu vehiculonan no ta busca un caminda rond di nan. Segun e abogado, piedranan cu Gobierno a coloca anteriormente a wordo kita y no a wordo poni bek, apesar di peticionnan di ABC. P’esey, e organisacion ta pidi pa e obligacionnan wordo acompaña pa un multa: un suma cu mester wordo paga si e orden di Corte no wordo cumpli. Rep a indica tambe cu ABC a retira e parti di su exigencia tocante delimitacion di California Dunes, pasobra e medida ey entretanto a wordo ehecuta. E otro exigencianan relevante a keda manteni.

GOBIERNO MESTER EHECUTA SU PROPIO MANEHO

Den su argumento, Rep a referi na e ROPV, legislacion di proteccion di naturalesa y diferente estudio y conseho cu, segun ABC, ta limita actividadnan cu tin un impacto negativo riba e areanan protehi. El a sostene tambe cu traha un ruta nobo ta exigi respet pa e destinacion di e tereno, e proceduranan di permiso y e efectonan riba medio ambiente. E mensahe central di ABC na Corte tabata cu e organisacion ta pidi cumplimento cu reglanan y maneho cu Gobierno mes a establece. “ABC a pidi Land pa duna ehecucion na su propio maneho,” Rep a declara. E argumentonan presenta ta forma parti di e posicion di ABC den e caso. Nan no ta representa un decision di huez riba e contenido di e disputa.