Aruba y Venezuela ta explora corredor comercial nobo

ORANJESTAD — Minister di Finansa y Asunto Economico, Geoffrey Wever, a reuni cu representante di Fedecámaras Venezuela, Beatrize Blanco, y presidente di San Nicolas Business Association (SNBA), Errol de Freitas, pa explora oportunidadnan di cooperacion comercial entre Aruba y Venezuela.

Durante e reunion, Blanco a presenta un propuesta pa crea un corredor comercial cu ta conecta productornan y empresarionan Venezolano cu mercado Arubiano y eventualmente otro mercadonan Caribense.

Segun e concepto, Aruba por funciona como un centro logistico pa exhibicion, distribucion y reexportacion di productonan Venezolano. Entre e oportunidadnan menciona ta material di construccion, producto industrial, industria ligero, paketamento y ensamblaje na Aruba.

Blanco a destaca stabilidad politico y huridico di Aruba como un bentaha pa empresarionan internacional.

Minister Wever a expresa interes pa sigui explora e iniciativa, pero a enfatisa necesidad di concretisa e plannan y evalua aspectonan manera transporte, aduana, free zone, rekisito sanitario y sistema di pago.

E reunion ta representa un prome paso pa un posibel cooperacion comercial mas amplio entre ambos pais, cu potencial pa diversifica economia di Aruba y crea oportunidadnan nobo pa sector empresarial.