PPA ta propone doble castigo minimo pa posesion ilegal di arma

ORANJESTAD — Partido PPA ta propone pa Parlamento evalua posibilidad di doble e castigo minimo pa posesion ilegal di arma di candela, cu un pena di dies aña menciona como opcion. Segun e partido, e legislacion actual mester wordo evalua pa determina si e consecuencia penal ta suficientemente severo pa desanima posesion ilegal di arma.

Durante un conferencia di prensa, parlamentario Eduard Pieters y lider di PPA Otmar Oduber a expresa preocupacion tocante cantidad di arma ilegal cu polis ta sigui confisca durante controlnan.

Pieters a señala cu agentenan policial ta risca nan bida ora nan confronta personanan arma, mientras cu e consecuencia penal, segun dje, mester wordo examina pa determina si e ta proporcional na e peligro. El a referi tambe na preocupacionnan di desmotivacion den Cuerpo Policial.

Oduber a enfatisa cu Aruba no ta un pais caminda ciudadano por carga arma libremente. "Pensa bon prome cu bo sali cu un arma ilegal, pasobra e consecuencia por cambia bo bida," el a declara.

PPA ta sostene cu Parlamento mester evalua e legislacion vigente y determina si un aumento di castigo por contribui na prevencion y seguridad publico. E partido ta propone un enfoque cu combina control policial, investigacion y consecuencia penal mas severo.

E propuesta ainda mester wordo defini legalmente, incluyendo e distincion entre posesion ilegal y uzo criminal di arma.