Trahadonan di Wit Gele Kruis a habri dialuna bou di protesta

ORANJESTAD — Trahadonan di Wit Gele Kruis a inicia dialuna mainta cu un accion di protesta di un ora na sede di e organisacion na Santa Cruz. E accion, organisa pa sindicato ABV, ta resultado di malcontento profundo entre empleadonan tocante desigualdad salarial y diferencia den condicionnan laboral cu, segun sindicato, ta existi desde 2022. Presidente di ABV, Gina Maduro, a splica cu e conflicto ta draai rond di dos grupo di trahado den e mesun organisacion, cu no ta ricibi e mesun beneficionan, apesar cu nan ta traha bou di e mesun fundacion. Segun Maduro, actualmente tin 27 empleado cu ta ricibi beneficionan manera prima di base, gratificacion y dia liber adicional (ATV), mientras cu un grupo mas grandi di 103 trahado no ta disfruta di e mesun derechonan.

AUMENTO SALARIAL TA AUMENTA FRUSTRACION

E situacion a bira mas delicado awor cu, cuminsando dialuna, e grupo di 27 empleado lo ricibi un aumento salarial, mientras cu e otro 103 trahadonan ta keda afo. "Nos no kier tin dos sorto di trahado. Nos kier un solo categoria di empleado, cu igualdad di trato y e mesun beneficionan", Maduro a declara. Segun e lider sindical, empleadonan ta sinti nan mes decepciona y frustra, pasobra e desigualdad aki ta continua pa varios aña sin un solucion concreto. Maduro a indica cu ABV a haya reconocimento oficial como sindicato na Wit Gele Kruis dia 5 di augustus 2024. Sinembargo, negociacionnan pa un convenio colectivo di trabou (CAO) a cuminsa te na mitar di april di e aña aki, despues di cambionan den direccion di e organisacion. Desde principio di e negociacionnan, sindicato a insisti riba eliminacion di e diferencia entre e dos gruponan.

DIRECTOR NO TA DISPUESTO PA ELIMINA DIFERENCIA

Segun Maduro, durante deliberacionnan di diabierna pasa, e director a laga compronde cu e kier mantene e distincion entre e dos gruponan di empleado. ABV no ta acepta e posicion aki y ta exigi un acuerdo concreto cu ta garantiza igualdad di trato Sindicato a propone pa inclui den un protocolo cu e diferencia salarial y di beneficionan mester wordo elimina, cu un fecha concreto pa implementacion. Pero te awor no a logra un acuerdo satisfactorio. "Nos ta lucha pa igualdad di trato. E desigualdad aki mester desaparece, pa nos keda cu un solo sorto di trahado", Maduro a enfatisa.

CUIDO DI PASHENTNAN NO POR WORDO PERHUDICA

E presidente sindical a aclara cu e accion di dialuna ta dura solamente un ora y cu a tuma consideracion pa evita cu pashentnan sufri consecuencia. "Bo no por perhudica e pashent. E cuido mester continua", Maduro a declara. Sinembargo, el a adverti cu e protesta di dialuna ta solamente un señal di advertencia. Si e director no presenta un solucion satisfactorio, sindicato ta prepara pa intensifica su accionnan. "Si nos no haya un contesta positivo, nos lo sigui intensifica. Nos no por sigui wanta e situacion aki", e lider sindical a afirma.

ABV TA EXIGI INVESTIGACION DEN ADMINISTRACIONAdemas di e conflicto salarial, Maduro a expresa preocupacion serio tocante maneho administrativo y financiero di Wit Gele Kruis. Segun e, e sindicato a identifica varios deficiencia den organisacion, incluyendo ausencia di un departamento formal di Recursos Humano (HR). "Un fundacion cu 67 aña di existencia no tin un departamento di HR. Unda bo ta cuminsa anto?", Maduro a cuestiona. El a critica e manera tambe cu e organisacion ta administra su recursonan y a señala cu no ta corecto pa un institucion depende continuamente di Gobierno pa tapa deficiencianan financiero causa pa problema di maneho. Segun Maduro, e director tin responsabilidad pa administra e institucion adecuadamente y, si ta necesario, negocia cu Gobierno pa haya recursonan adicional. ABV ta exigi un evaluacion inicial (nulmeting) y un investigacion profundo pa determina unda e problemanan administrativo y financiero realmente ta.

POSIBILIDAD DI MAS ACCION

Maduro a confirma cu sindicato ya a busca contacto cu direccion pa determina cua lo ta e siguiente paso. E posicion di ABV ta cu no por sigui mantene un sistema den cua un grupo di empleado ta disfruta di derechonan y beneficionan cu otro grupo, den e mesun organisacion, no ta ricibi. E protesta di dialuna mainta ta marca un aumento di presion sindical riba direccion di Wit Gele Kruis, mientras cu futuro di e negociacionnan di CAO y posibilidad di mas accion ta depende di e reaccion di direccion.