AZV: A duna Hospital Horacio Oduber Afl. 15 miyon extra

ORANJESTAD — Organo Ehecutivo di AZV (OE AZV) a anuncia cu a otorga Horacio Oduber Hospital (HOH) un adelanto adicional di Afl. 15 miyon pa atende su problemanan actual di liquidez. Cu esaki, e total di adelantonan adicional na hospital durante 2026 a yega Afl. 31 miyon.

Segun AZV, desde februari e institucion ta facilitando recursonan financiero adicional pa HOH, mientras cu Ministerio di Salud Publico, hospital y AZV ta den deliberacion pa busca solucionnan.

Sinembargo, AZV ta enfatisa cu e fondonan publico aki ta wordo otorga bao condicionnan specifico, pa garantisa uzo responsabel di placa di aseguradonan y proteha continuidad, accesibilidad y calidad di cuido medico.

Actualmente, e partidonan ta wardando resultado di varios estudio cu mester yuda determina un solucion structural y duradero pa e problemanan financiero di hospital.

AZV ta expresa confiansa cu dialogo, cooperacion y transparencia entre e institucionnan lo contribui na un solucion na beneficio di aseguradonan di Aruba.