Parlamentario Maduro ta destaca balor cultural di buki Echoes of Africa di Bob Harms

ORANJESTAD — Parlamentario Xiomara Maduro a destaca importancia di documenta y preserva herencia cultural di Aruba durante presentacion di e buki Echoes of Africa, di autor Bob Harms, na Archivo Nacional Aruba.

E buki ta explora influencia di tradicionnan spiritual Afro-Crioyo riba identidad cultural di Aruba, Corsou y Boneiro. E investigacion ta enfoca riba creencianan y custumbernan ancestral cu durante hopi aña no a haya suficiente reconocemento.

Entre e tradicionnan documenta ta curacion tradicional, uzo di mata medicinal, ritualnan di despedida y Ocho Dia. E obra ta ilustra con influencia Indigena, Africano y Europeo a contribui na formacion di cultura di nos islanan. “Si nos no documenta esakinan, nos ta core riesgo di perde un parti importante di nos identidad,” Maduro a declara.

Segun e parlamentario, investigacion cultural ta esencial pa conserva memoria colectivo y permiti generacionnan futuro compronde nan historia.

Maduro a felicita Bob Harms pa su contribucion y a enfatisa: “Cultura bo tin cu bib’e, pero tambe document’e pa generacionnan cu ta bin.”