Defensa lo vigila seguridad rond Caribe Hulandes permanentemente

DEN HAAG — Defensa a haya e tarea permanente di vigila e situacion di seguridad rond e parti Caribense di Reino, incluyendo Aruba. E decision ta busca pa detecta menasanan mas lihe y anticipa desaroyonan geopolitico cu por afecta e region.

E tarea ta reemplasa un mandato temporal cu tabata vigente desde september di aña pasa. Segun gabinete Hulandes, e tensionnan geopolitico creciente ta exigi un fluho continuo di informacion tocante actividadnan di paisnan y actornan no estatal den Laman Caribe.

Defensa lo sigui, entre otro, cambionan den presencia militar y actividadnan di otro paisnan den e region. E vigilancia lo forma parti structural di e tareanan di Forsanan Arma.

Defensa ya tin personal y ekipo permanentemente den Caribe Hulandes pa proteha territorio di Reino, contribui na orden huridico internacional y asisti autoridadnan civil.