Lider interino di UPB Jolinda Craane awe nochi den Noticiacla LIVE

ORANJESTAD — Awe nochi, dia 29 di oktober, Noticiacla LIVE ta ricibi como invitado special e lider interino di partido Union Patriotiko Boneriano (UPB) di Boneiro, Jolinda Craane. E programa ta cuminsa pa 8:30 di anochi y por wordo sigui riba e plataformanan di Noticiacla. Craane, kende a asumi liderazgo interino di UPB na juni di e aña aki, ta representa un generacion nobo di liderazgo den un partido cu tin un historia largo den politica Boneriano. Su participacion den Noticiacla LIVE ta sigui su reciente bishita na Aruba, caminda el a participa na Congreso 2026 di partido AVP, cu a marca e transferencia di liderazgo di Mike Eman pa Wendrick Cicilia.

CRAANE A BISHITA ARUBA RECIENTEMENTE

Durante e bishita aki, Craane a papia cu Noticiacla tocante su experiencia na Congreso di AVP y e diferencia entre ambiente politico di Aruba y Boneiro. “Na Boneiro nos ta un poco mas pacifico,” Craane a declara, mientras cu el a describi e energia y entusiasmo durante e congreso como algo impresionante. E lider di UPB a reconoce cu e experiencia a dun'e oportunidad pa observa di cerca con un partido ta mobilisa su base y organiza un transicion di liderazgo. “Ta un momento grandi pa experiencia aki y duna un idea tambe con nos por haci na Boneiro,” el a bisa na Noticiacla.

UN PARTIDO DEN TRANSICION

Craane a asumi liderazgo interino di UPB despues di James Kroon, den un periodo cu partido ta enfoca riba renovacion politico y fortalecemento di su relacion cu comunidad Boneriano.  Recientemente, Craane a presenta su vision pa futuro di Boneiro, basa riba tres principio: protega loke tin balor, inverti den desaroyo di isla y conecta diferente sector di comunidad. E vision aki ta pone enfasis riba desaroyo economico, cooperacion y participacion di comunidad den futuro di Boneiro.

AWE NOCHI PA 8:30

Cu Jolinda Craane como invitado, Noticiacla LIVE ta ofrece publico di Aruba y Boneiro oportunidad pa conoce mas di cerca e lider interino di UPB, su vision y e desaroyonan politico na Boneiro. Noticiacla LIVE ta cuminsa awe nochi, diahuebs 29 di oktober, pa 8:30 di anochi, riba e plataformanan di Noticiacla.