Pareha cu a bishita Aruba declara culpabel di fraude millonario

ORANJESTAD — Un pareha cu a viaha entre Colombia y Aruba na 2024 a wordo declara culpabel na Merca di un fraude cu a kita mas cu 1,62 miyon dollar for di programanan destina pa personanan di edad, personanan cu discapacidad y hende sin cas.

Segun e articulo di Emma Caplan-Fisher, basa riba informacion di autoridadnan americano, Jael Watts (45) di New Jersey y Luis Pino-Copete (42) di Colombia a uza Pearl Transit Corporation pa pidi mas cu 13 miyon dollar den fondo federal. E compania a presenta reclamonan falso pa servicio di transporte cu nunca a wordo duna, uzando identidad roba y registro inventa.

E pareha a gasta sumanan grandi riba biahenan, paña di lujo y huur di Porsche. Aruba ta menciona como un di nan destinacionnan di biahe; e informacion presenta no ta indica cu e fraude a wordo cometi na Aruba.

E audiencia pa determina nan castigo ta programa pa 21 di januari 2027. Nan ta enfrenta añanan di prizon, boet y obligacion di restitucion.