SEPPA ta cancela accion di diahuebs na Arubus despues di acuerdo cu Gobierno

ORANJESTAD — E accionnan planea pa diahuebs na Arubus a keda cancela despues cu SEPPA y Gobierno a termina nan discusionnan diaranson anochi cu compromisonan tocante finanzas di e empresa y un convenio colectivo di trabou (CAO) nobo. Secretario general di SEPPA, Magaly Brito, a informa Noticiacla di e desaroyo positivo di ultimo ora, despues di e accionnan laboral di e ultimo dianan.

Segun Brito, Gobierno a regla pa entrante 1 di oktober 2026 e entrada di CPF — e placa cobra pa cada pasahero cu drenta Aruba via crucero — wordo destina bek na Arubus. E entrada aki a wordo kita for di Arutram na 2020. Cu e areglo nobo, segun SEPPA, Arubus lo no carga e peso financiero grandi di Arutram mas y lo tin mas espacio pa negocia.

Brito a indica cu Gobierno a pidi Arubus diamars atardi pa presenta su calculacionnan un biaha mas. Basa riba esaki, Gobierno a compromete pa aumenta e subsidio of fondo pa Arubus entrante 1 di januari 2027, pa haci posible un CAO nobo cu drenta na vigor e mesun fecha. E subsidio ainda mester wordo regla den Parlamento.

SEPPA y Arubus lo reuni diamars 6 di oktober pa finaliza e CAO. Pa e periodo actual di 2026, trahadornan lo ricibi un pago unico, of lumpsum, manera den añanan anterior. Arubus a propone pa haci e pago aki dia 8 di december 2026.

Tocante e debe di impuesto, Brito a informa cu Minister di Finanzas a duna Departamento di Impuesto ordo diamars pa cuminsa e trayecto pa regla e asunto. Segun e dirigente sindical, Arubus tambe a confirma esaki. E proceso ta habri caminda pa atende e debe; su eliminacion ainda mester wordo concreta.

SEPPA ta considera e compromisonan como un resultado di e lucha di trahadornan cu a mantene nan posicion durante e conflicto. “Sin lucha no tin logro,” Brito a expresa. Manera ta conoci, dialuna personal di Arubus a drenta den accion pa e problemanan menciona. Mirando cu no tabatin progreso inicial, a opta pa escala e accionan pa diahuebs. Esaki awor pues, a keda cancela.