PPA ta exigi claridad riba ken lo beneficia di cambionan den LNT

ORANJESTAD — Parlamentario di PPA, Eduard Pieters, ta exigi transparencia tocante ken lo beneficia di e cambionan proponi den Landsverordening Normering Topinkomens (LNT), prome cu su partido duna un opinion positivo. E ta cuestiona tambe pakico Gobierno ta consulta Parlamento awor, mientras segun e, no a haci esaki prome cu decisionnan anterior.

Pieters a menciona e excepcion salarial pa CEO di Aruba Airport Authority y e proceso di Consensusrijkswet HOFA. Segun e parlamentario, Gobierno no a busca opinion di Parlamento prome cu e excepcion pa aeropuerto, ni prome cu e proposicion di HOFA a bay pa Rijksministerraad, manera a acorda den IPKO.

“Parlamento no ta un stempel pa Gobierno uza ora ta conveniente,” Pieters a enfatisa, recordando cu Parlamento tin e responsabilidad di controla Gobierno.

Su preocupacion principal ta e proposicion pa introduci normanan salarial diferencia, adapta na circunstancianan specifico y cu referencia na e region. PPA kier sa cua entidadnan y funcionnan lo cay bou di e sistema, ken lo por cobra mas, cua criterio lo aplica y cua region lo uza pa comparacion.

Pieters a menciona ATA y Banco Central di Aruba como institutonan cu mester competi internacionalmente pa profesionalnan. E ta pidi un lista concreto di e entidadnan involucra y claridad tocante calculo y supervision di e salarionan, prome cu Parlamento expresa su respaldo.