Doñonan tin te 23 di september pa kita auto bandona for di caminda publico

ORANJESTAD — Gobierno di Aruba, Korps Politie Aruba (KPA) y otro instancianan concerni lo inicia un accion pa retira vehiculonan bandona for di caminda y espacio publico, cuminsando na Oranjestad.

Doñonan tin te 23 di september pa kita nan vehiculo boluntariamente. For di 24 di september, autoridad lo cuminsa retira autonan identifica como bandona. E gastonan relaciona cu retiro y proceso posterior lo ta pa cuenta di e doño.

Segun Korpschef Ramon Arnhem, diferente vehiculo sin plachi number of cu ta para pa tempo largo a wordo identifica. Ademas di afecta imagen di e isla, vehiculonan bandona por contribui na acumulacion di desperdicio y situacionnan menos sigur y higienico.

KPA tin posibilidad pa investiga ken ta doño di un vehiculo, hasta si e auto no tin number.

E prome fase lo concentra riba Oranjestad, particularmente den y rond di centro di ciudad, y lo funciona como proyecto piloto. Despues di evalua e proceso, intencion ta pa amplia e accion gradualmente pa otro area di Aruba.

Serlimar a señala cu auto bandona frecuentemente ta bira punto di acumulacion di otro desperdicio, cu por atrae plaga y afecta condicion di e bario.

E mensahe di autoridad ta cla: caminda y espacio publico no ta luga pa laga vehiculo bandona indefinidamente.