Hues ta mantene e prohibicion: E companianan no por huur e-steps sin permiso

ORANJESTAD — Corte di prome instancia di Aruba a rechasa e peticionnan di e dos companianan Friendly Green Bike Company Aruba VBA y Evikes Corporation VBA pa suspende e orden di Gobierno cu ta obliga nan stop cu huur di e-steps, e-bikes y otro vehiculonan electrico sin e permiso rekeri. E sentencia a wordo duna dia 16 di september 2026.

E caso a sigui despues cu minister encarga cu transporte publico a impone ‘un last onder dwangsom’ riba ambos compania dia 29 di juni 2026. Gobierno ta sostene cu e vehiculonan ta cai bou definicion legal di “verhuurmotorfiets” y cu, conforme Landsverordening personenvervoer, un permiso ta obligatorio.

Green Bike y Evikes a argumenta cu e ley no ta aplica riba e-steps y e-bikes y cu un paro di nan actividad, lo causa daño financiero serio y por pone continuidad di nan empresa na peliger. E corte a reconoce cu nan posicion financiero ta bou presion, pero a determina cu esaki no ta suficiente pa suspende e medida.

Segun e huez, e-steps y e-bikes ta vehiculonan di dos wiel, sin structura cera, cu ta wordo movi completamente of parcialmente pa un motor electrico. Pa e motibo ey, nan ta cai bou e definicion relevante den ley. Como Green Bike y Evikes no tin e permiso rekeri, e corte ta considera cu nan ta actuando contra ley.

Corte tampoco a mira un posibilidad concreto pa legalisa e situacion. E companianan mes a pidi primordialmente pa nan aplicacion di permiso wordo rechasa, mientras Gobierno anteriormente a indica cu no tin bista riba legalisacion di e-steps.

Consecuentemente, e peticionnan di Green Bike y Evikes a wordo rechasa. E orden di Gobierno ta keda na vigor, incluyendo un posible dwangsom di Afl. 500 pa vehiculo pa cada dia of parti di dia cu e infraccion continua. Contra e decision aki no tin apelacion. Click AKI pa e sentencia