Landspakket Aruba tin placa pa 2027, pero extension despues di april ainda no confirma

ORANJESTAD — Un dia prome cu Prinsjesdag na Hulanda, documentonan cu a leak ta duna hopi informacion tocante e presupuesto Hulandes pa 2027. Sinembargo, investigacion di Noticiacla no a haya un confirmacion publico ainda cu Hulanda a dicidi definitivamente pa prolonga e Landspakket pa Aruba despues di 4 di april 2027.

Loke si ta cla, ta cu den e presupuesto multianual existente Hulanda ya tin un cantidad considerable di placa reserva pa trabou relaciona cu Landspakketten y Tijdelijke Werkorganisatie (TWO) den 2027.

Pa 2027, Hulanda tin €49 miyon reserva como subsidio relaciona cu TWO y otro €7,5 miyon pa encargo y proyectonan cu TWO ta ehecuta. Esaki ta un total di aproximadamente €56,5 miyon pa Aruba, Corsou  y Sint Maarten hunto. Ademas tin otro gastonan relaciona cu obligacionnan anterior.

Esaki ta un señal importante, pero ainda no ta prueba cu Landspakket lo sigui despues di april.

4 DI APRIL 2027 TA E FECHA CLAVE

E Onderlinge Regeling Samenwerking bij Hervormingen, cu ta forma e base huridico di Landspakketten, a drenta na vigor dia 4 di april 2023 pa un periodo di cuater aña. Pues, normalmente e acuerdo ta caba 4 di april 2027.

E regeling si ta permiti Aruba, Corsou y Sint Maarten prolonga e cooperacion cu Hulanda pa periodonan adicional di maximaal dos aña.

Gobierno Hulandes ya a indica anteriormente cu durante 2026 lo mester tuma un decision, basa entre otro riba evaluacion di Landspakketten, si e cooperacion lo continua.

Den documentonan oficial Hulandes tambe ta confirma cu Aruba ainda ta den pleno proceso di ehecucion di diferente reforma y cu Gobierno di Aruba ta mira Landspakket como oportunidad pa implementa varios punto di su propio programa di gobernacion.

PLACANAN PA 2027 NO TA E MESUN CU EXTENSION

E existencia di mas cu €56 miyon pa TWO den 2027 ta importante, pero tin un detaye crucial.

Landspakket ya ta continua automaticamente te 4 di april 2027. Ademas, algun projecto y obligacion financiero por sigui despues di e fecha ey aunke no haya un extension completo di e acuerdo.

Pesey Noticiacla no por conclui ainda cu e Landspakketten definitivamente ta continua pa Aruba despues di april 2027 solamente basa riba e placa cu ya ta reserva.

Loke ta falta ta un decision politico y formal di Hulanda y Aruba pa prolonga e cooperacion.

PRINSJESDAG POR DUNA E CONTESTA

E informacion mas importante probablemente no lo aparece literalmente den Discurso di Rey Willem-Alexander.

E contesta mester wordo busca principalmente den e Begroting Koninkrijksrelaties 2027 y su Memorie van Toelichting.

Un señal hopi fuerte lo ta si e presupuesto nobo mustra placa pa TWO y Landspakketten no solamente pa 2027, pero tambe pa 2028 y 2029.

Den e presupuesto actualmente publico, TWO tin €49 miyon como subsidio pa 2027, pero e linea ey ta baha na cero pa 2028, 2029 y 2030.

Pesey, si Prinsjesdag di diamars 15 di september trece placa nobo pa TWO despues di 2027, esey lo ta un indicacion fuerte cu Hulanda kier sigui cu Landspakketten.

Pero te e momento aki, un dia prome cu Prinsjesdag, e conclusion mas correcto ta: Hulanda tin placa reserva pa continua e trabou di Landspakket den 2027, pero ainda no tin confirmacion publico cu e cooperacion cu Aruba lo wordo prolonga despues di 4 di april 2027.

Diamars e begroting nobo di Koninkrijksrelaties mester duna un contesta mucho mas cla.