32 aña pasa Alexandra Ochoa a pone Aruba den top di Miss International

ORANJESTAD — Ta 32 aña pasa cu Alexandra Ochoa, Miss Aruba 1993-1994, a representa Aruba na Miss International 1994 na Hapon y a logra un resultado historico: prome finalista entre 50 pais participante.

E participacion tabata e prome biaha cu Aruba a competi na Miss International. Ochoa a destaca cu un bisti diseña pa Jaime Arango, a clasifica entre e 15 finalistanan y finalmente a termina como prome finalista. Miss Grecia a gana e corona y Miss España a keda como segunda finalista.

E resultado a causa gran entusiasmo na Aruba. Ruben “Scorpio” Garcia tabata entre esnan cu a anuncia e noticia na radio, mientras Ochoa a wordo ricibi cu hopi entusiasmo ora el a bolbe isla.

Un aña prome, Ochoa a wordo corona Miss Aruba 1993 den Aruba Entertainment Center durante un evento di Star Promotions. E titulo ey despues a habri caminda pa uno di e resultadonan mas destaca di Aruba den certamennan internacional di beyesa.