Mary Joan Foundation ta muda pa centro mas grandi y pidi sosten pa cubri gastonan

ORANJESTAD — Mary Joan Foundation (MJF) ta muda bai Santa Cruz 154-A, unda e fundacion lo opera for di un centro mas grandi cu diferente servicio reuni bou di un solo dak. E espacio nobo lo conta cu area propio pa psicologo, chequeonan medico, proyecto di peluca, actividadnan pa clientenan y e proyecto Workshop Factory.

Segun MJF, e meta ta pa haci e servicio mas accesibel y integra pa clientenan, especialmente esnan cu ta lucha contra cancer. E fundacion ta sigui un enfoke holistico, den cual cuido di curpa, mente y alma ta considera parti di e proceso di recuperacion.

MJF ta indica cu su situacion financiero ta keda dificil. E fundacion ta ricibi Afl. 5.000 pa luna di subsidio di Gobierno, mientras su gastonan ta aproximadamente Afl. 14.000 pa luna. Ayudo psicologico no ta wordo cubri pa AZV, y MJF ta bisa cu e ta cubri e gastonan aki for di su propio fondo.

Pa yuda financia su servicio, e fundacion ta haci un yamada na comunidad pa participa den un rifa di un sistema solar off-grid di 10 kW. Ticket ta costa Afl. 100 y sorteo lo tuma luga dia 31 di oktober 2026 via Facebook Live, den presencia di un notario.