Ultimo anochi di CNSJ 2026 a reuni jazz, reggae, latin y zouk

WILLEMSTAD — Curaçao North Sea Jazz Festival 2026 a cera diasabra anochi cu un line-up particularmente diverso, reuni algun di e nombernan mas respeta den jazz, reggae, musica latino y zouk riba un solo festivalterrein.

Un di e atraccionnan special tabata e legendario gitarista Americano Al Di Meola, kende pa prome biaha a presenta riba e festivalterrein mes, despues di a impresiona publico durante e pre-conciertonan na Brakke Put Mei Mei na 2013. Conoci pa su velocidad excepcional y tecnica virtuoso, Di Meola a move durante su carrera entre jazzfusion, rock, latin y musica Sur-Americano. Su colaboracion cu John McLaughlin y Paco de Lucia riba Friday Night in San Francisco a bira un di e grabacionnan mas influencia den historia di gitara acustico.

Jon Batiste a trece un otro dimension na e ultimo anochi. E cantante, compositor, pianista y multi-instrumentalista Americano tin ocho Grammy y ta conoci pa combina gospel, soul, pop, blues y rock-’n-roll. Su album We Are a gana Grammy pa Album of the Year, mientras su produccion mas reciente, Big Money di 2025, ta sigui mustra e amplitud di su estilo musical.

Jazz a haya un posicion central cu Dianne Reeves, kende a uni forza cu e Branford Marsalis Quartet. Reeves, ganador di cinco Grammy y considera un di e cantantenan di jazz mas versatil di su generacion, ta riba gira mundial cu Marsalis cu un proyecto dedica na John Coltrane, conecta cu e centenario di su nacimento.

Reggae tabata representa pa Stephen Marley, e di dos yiu di Bob Marley y ganador di ocho Grammy. Desde su inicio como mucha den The Melody Makers, Marley a construi un carrera exitoso como cantante, compositor, musico y productor. Su album Old Man di 2023 inclui colaboracion cu Eric Clapton, Jack Johnson y su rumanan Ziggy y Damian Marley.

E energia latino a bin di J Balvin, un di e artistanan Latino-Americano mas influencia y mas stream di mundo. Cu mas di 35 miyon disco bendi, nominacionnan pa Grammy y Latin Grammy y presentacionnan como headliner na festivalnan grandi manera Coachella y Lollapalooza, e Colombiano ta wordo considera un figura clave den internacionalisacion di musica urbano latino.

Y e conexion Caribeño a haya su expresion mas fuerte na final di e anochi cu Kassav’, e grupo cu desde 1979 a contribui na crea y popularisa zouk. Inspira pa gwo-ka di Guadeloupe y ti-bwa di Martinique, Kassav’ a hiba su sonido Afro-Caribeño pa Latinoamerica, Africa, Europa y Asia. Cu mas di 20 album, e banda ta sigui combina ritmo Africano cu energia moderno Caribeño.

E ultimo anochi di Curaçao North Sea Jazz 2026 asina a cera e festival cu un mezcla fuerte di virtuosismo, historia musical y ritmo internacional, caminda jazz, reggae, latin y zouk a comparti e mesun escenario.