Tevreden: impasse rond UTV, ATV y ruta di tour ta pone trabou di 800 trahado na peliger

ORANJESTAD — Parlamentario Hendrik Tevreden ta adverti cu e impasse rond ceramento di rutanan y regulacion di excursionnan turistico ta pone e trabou di alrededor di 800 trahado y nan famianan na peliger.

Segun Tevreden, e problema ta bay mas leu cu un desacuerdo tocante un ruta. E sector a funciona pa hopi tempo cu regulacion, identificacion y control insuficiente, mientras falta un dialogo structura entre Gobierno, operadornan y organisacionnan ambiental.

E tour operatornan legal ta bisa cu nan no ta contra proteccion di naturalesa, pero nan ta pidi reglanan cla, control di operadornan ilegal y rutanan oficialmente defini. Nan ta critica tambe e ceramento abrupto di rutanan sin consulta previo, mientras nan operacionnan, personal y reservacionnan ta depende di e producto turistico aki.

Tevreden ta sostene cu e proceso hudicial inicia pa Aruba Birdlife Conservation no por bira un excusa pa inaccion di Gobierno. Segun e, companianan ta sigui carga salarionan y gastonan mientras e incertidumbre ta continua.

Fraccion di MEP ta pidi Gobierno pa reuni DNM, DTP, DOW, otro autoridadnan, organisacionnan ambiental y tour operatornan legal pa identifica vehiculonan autorisa, combati operacion ilegal, defini rutanan y zonanan protegi, y introduci sancionnan y control mas efectivo.

Segun Tevreden, Aruba por proteha su naturalesa y na mes momento conserva actividad economico, pero esaki ta requeri regulacion y decisionnan concreto.