Aruba Bank ta destaca rol crucial di prensa y gradici medionan pa nan aporte na comunidad

ORANJESTAD — Aruba Bank a pone prensa local den centro di atencion durante su evento anual di apreciacion pa prensa, organisa diamars na Surfside Beach Bar den cuadro di Press Day.

Managing Director di Aruba Bank, Rob de Ridder, a duna palabra di bon bini na representantenan di diferente medio di comunicacion y a gradici nan pa e papel importante cu nan ta cumpli diariamente den comunidad Arubano.

De Ridder, kende ta aproximadamente un aña na Aruba, a recorda cu e celebracion di Press Day di aña pasa tabata un di su prome encuentronan oficial cu prensa local.

“Mi ta un aña na Aruba awor y durante e periodo aki mi a mira hopi di boso na conferencia di prensa y diferente evento. Boso a sostene loke nos ta haci, pero naturalmente semper manteniendo boso propio papel,” De Ridder a bisa.

Un momento special durante su discurso tabata ora e director di Aruba Bank a cumpli cu un promesa cu e a haci aña pasa: trata di dirigi algun palabra na prensa na Papiamento.

“Mi a tuma algun les, pero pa hacie for di memoria, talbes otro aña,” e la bisa cu humor, prome cu e la continua su discurso na Papiamento.

De Ridder a destaca dedicacion di periodistanan pa busca noticia, haci pregunta y mantene comunidad informa.

“Nos ta mira den prensa hopi dedicacion, semper buscando e siguiente noticia, haciendo pregunta y manteniendo nos comunidad informa,” el a bisa.

Segun De Ridder, Aruba Bank tin gran aprecio pa trabou di prensa y pa e relacion cu banco a construi cu medionan di comunicacion durante añanan.

“Boso ta hunga un rol importante den nos comunidad y nos ta agradecido pa e bon relacion y colaboracion cu nos a construi cu boso durante añanan.”

Contrario na un conferencia di prensa tradicional, e encuentro tabatin hustamente como meta pa prensa por relaha y disfruta di e ocasion.

“Awe nos no tin comunicado di prensa ni pregunta. Awe nos ta invita boso pa simplemente relaha, disfruta di snack, musica y bon compania, y laga nos celebra boso,” De Ridder a bisa.

E Managing Director a finalisa gradiciendo prensa pa su contribucion diario na sociedad Arubano: “Danki pa loke boso ta haci pa nos comunidad.”