Tres homber arma a atraca victima na Cumana

CUMANA – Un homber a wordo atraca pa tres sospechoso arma durante madruga di diabierna na un apartamento na Cumana.

Pa mas o menos 1:45’or, Central di Polis a despacha un patruya di Oranjestad pa e sitio despues di ricibi informe di un atraco. Na yegada, e victima a declara cu tres homber a atac’e y cu un di nan tabata carga un arma di candela.

Segun e victima, e sospechosonan a dal’e cu e arma tras di su nek y despues a huy cu varios pertenencia, entre otro cadenanan, renchi, holoshi y placa.

E tres sospechoso tabata bisti na paña scur, cu nan cara tapa. Nan a papia Papiamento y Spaño, y a huy na pia.

Personal di ambulance a controla e victima y a brind’e asistencia medico. Atraco Team y Polis Tecnico a presenta na e sitio pa inicia investigacion.

Cuerpo Policial Aruba ta pidi tur persona cu tin informacion of cu por a mira algo, pa yama tipline di polis na 11141. E yamada ta keda anonimo.