Taxistanan na Corsou contra permit temporal den temporada abou

WILLEMSTAD – Comision di Taxi na Corsou ta rechasa decision di Gobierno pa sigui duna permit temporal pa taxi durante temporada abou.

E medida a wordo introduci algun luna pasa pa atende e falta di taxi na diferente sitio durante temporada halto. Segun comision, na e momento a comunica cu e permitnan lo ta valido solamente durante e periodo di mas actividad turistico.

Sinembargo, Gobierno a extende e permitnan pa temporada abou, mientras cu actualmente tin menos trabou y movimiento turistico ta ketu.

E comision a declara cu e no ta di acuerdo cu mas permit temporal den e situacion actual. E decision final ta den man di Gobierno, pero e comision ta pidi apoyo y unidad di tur taxista pa demonstra e preocupacion di sector.

E comision lo anuncia e siguiente pasonan pronto y posible accionnan pa defende interes di taxistanan.