A.T.A. a celebra Dia di Prensa cu aprecio y dialogo cu media local

ORANJESTAD – Aruba Tourism Authority (A.T.A.) a ricibi mas cu 25 miembro di prensa local pa un mainta special den cuadro di Dia di Prensa 2026, cu enfasis riba aprecio, intercambio di informacion y colaboracion.

Durante e encuentro, A.T.A. a comparti informacion tocante su trabou, prioridadnan y vision, como tambe e desaroyonan actual den industria di turismo. Miembronan di prensa a haya oportunidad di conoce diferente miembro di e organisacion y haya mas informacion tocante su strategia di comunicacion, proyectonan local y iniciativanan enfoca riba turismo responsabel y sostenibilidad.

CEO di A.T.A., Ronella Croes, a destaca importancia di un relacion fuerte cu prensa local. “Nos relacion cu prensa local ta di gran importancia pa A.T.A.,” Croes a expresa, agregando cu colaboracion cu media ta esencial pa mantene Aruba bon informa.

A.T.A. a gradici tur periodista, reportero, fotografo, editor, presentador y otro profesional di media pa nan contribucion y compromiso continuo cu comunidad.