Musico Johnny Croes ta pidi mas calidad den educacion musical na Aruba

ORANJESTAD – Maestro y musico Johnny Croes ta haci un apelacion pa Aruba fortalece calidad, continuidad y vision den educacion di musica pa muchanan.

Segun Croes, musica no ta solamente entretenimiento, pero ta yuda desaroya disciplina, creatividad, concentracion, memoria y cooperacion. E ta enfatisa cu acceso solamente no ta suficiente: tur mucha mester tin oportunidad pa haya educacion musical di calidad.

Croes ta considera cu maestro di klas y maestro specialisa den musica mester complementa otro. E ta destaca tambe importancia di cooperacion entre scolnan, Gobierno, institucionnan y sector cultural.

Segun e, Aruba ya tin un fundeshi, experiencia y talento. E reto awor ta modernisa e curiculo, fortalece formacion di maestronan y conecta musica mas fuertemente cu Papiamento, cultura y identidad.

“Nos no mester inventa tur cos di nobo. Nos tin un fundeshi. Awor nos mester trece esakinan hunto,” Croes ta conclui.