Wever ta evita confirma ultimatum di Croes riba HOFA y descarta pa anticipa caida di Gobierno

ORANJESTAD – Minister di Finansa Geoffrey Wever a confirma cu e trayecto di ley di HOFA ta parti di e acuerdo di gobernacion entre AVP y FUTURO, pero durante un entrevista skerpi den Noticiacla LIVE, e mandatario a evita pa sostene e posicion mas duro expresa recientemente pa su colega Gerlien Croes: esta cu si no tin acuerdo riba un punto fundamental di e acuerdo di gobernacion, no tin mas Gobierno.

WEVER TABATA BIRA HOPI PA CONTESTA

Periodista Tito Laclé a insisti repetidamente pa haya un contesta cla di Wever, pasobra e mandatario tabata drey hopi sin contesta: E ta comparti e posicion di Croes, sí of no? Y si no tin acuerdo riba HOFA, esey ta un punto di ruptura pa coalicion? Wever a confirma cu e tema di supervision financiero y e negociacion cu Hulanda ta parti di e compromiso cu AVP y FUTURO a tuma ora nan a forma Gobierno. “Loke sí ta parti di e acuerdo di gobernacion, y loke Minister Croes a referí na dje, ta cu durante negociacion pa forma gobierno nos a papia riba e tema di RAFT/OFA.”

E PROCESO DI HOFA A CUMINSA CU GABINETE ANTERIOR

Segun Wever, e proceso no a cuminsa cu Gabinete AVP-FUTURO. Gobierno a hereda un trayecto cu ya tabata andando y cu gabinete anterior a inicia cu Hulanda. Durante formacion di Gobierno, AVP y FUTURO a acorda pa sigui e negociacionnan, cu entre otro e meta di logra un reduccion di interes riba debe nacional di Aruba.

“Dus, sí: e tema ta parti di acuerdo di gobernacion, den e sentido cu Aruba y Hulanda tabata den un fase avansa di negociacion y cu e negociacionnan mester a sigui.” Wever a agrega cu e actual gabinete a continua cu e mesun comision di experto cu tabata trahando riba e expediente y cu, segun e, e resultado actual ta “considerablemente mihor” cu loke Gobierno a haya ora e a drenta.

Pero Laclé no a laga e minister keda solamente cu e explicacion tecnico. “Mi pregunta ta: bo ta comparti loke bo colega, Minister Gerlien Croes, a bisa recientemente?” Wever a confirma e importancia di un acuerdo di gobernacion, pero no a ripiti e ultimatum di Croes. “Ora nos firma un acuerdo di gobernacion, nos ta haci cierto acuerdo y compromiso. Esey ta e base di un gobierno.”

GOBIERNO POR CAY?

Minister Gerlien Croes recientemente a presenta e asunto den terminonan mucho mas categorico: un acuerdo di gobernacion ta e base di coalicion y, si partnernan no por cumpli of yega na acuerdo riba un punto fundamental, e existencia mes di Gobierno ta wordo cuestiona. P’esey Laclé a sigui: “Pero esaki ta un ‘break point’ pa coalicion?” Wever a evita un si of no. “Mi no por anticipa riba con parlamentarionan lo vota, ni riba loke lo ta e resultado final di e negociacionnan. Mi no kier anticipa riba esey na e momento aki.”

DIFERENCIA NOTABEL

E diferencia ta notable. Wever ta confirma cu HOFA ta parti di rumbo acorda, pero e no ta confirma cu desacuerdo automaticamente mester significa caida di Gobierno. E minister a señala tambe cu e proceso ainda no ta final. E consehonan di Raad van Advies y Raad van State a trece observacionnan cu Gobierno mester atende, y Aruba ta sigui negocia  cu Hulanda pa yega na un producto final cu despues mester pasa pa Parlamento.

UN MINISTER POR KEDA MINISTER SI E TA CONTRA HOFA?

Laclé a hiba e pregunta un paso mas leu. “Si un miembro di gabinete no por sostene HOFA, segun bo personalmente, e por keda como minister?” Wever inicialmente a responde desde punto di bista constitucional. “Constitucionalmente, Conseho di Minister ta tuma decision pa mayoria.” Pero Laclé a insiste cu e no tabata puntra solamente kico ta constitucionalmente posibel. “Pero mi ta puntra bo personalmente. Si e persona no ta pro-HOFA y rumbo di Gobierno ta HOFA, bo ta kere cu e por keda minister?” Wever a reconoce cu un acuerdo di gobernacion crea compromiso.

“Mi ta kere cu ora nos firma un acuerdo di gobernacion, nos ta haci cierto acuerdo y compromiso. Esey ta e base di un gobierno.”

Sinembargo, e la agrega cu un minister por tin un opinion diferente, incluso riba un asunto importante, mientras Conseho di Minister finalmente a  tuma un decision y Gobierno sali pa afo como unidad.

E entrevista a bira ainda mas concreto ora Laclé a pone e caso di Mike de Meza riba mesa. De Meza a posiciona su mes publicamente contra HOFA y a pidi un referendum, mientras posibilidad di su entrada den gabinete a bolbe bira tema politico.

Laclé a puntra: “Como minister di Finansa y como figura clave den FUTURO, bo por acepta un colega minister cu publicamente ta contra un pieza financiero tan fundamental di acuerdo di gobernacion?” Wever a contesta: “Idealmente, bo kier cu tur miembro di Conseho di Minister ta alinea y di acuerdo cu e acuerdo di gobernacion.”

Y e la agrega cu si un persona drenta Gobierno sabiendo cu e ta fuertemente contra un parti fundamental di rumbo acorda, e ta crea “un situacion dificil”. Sinembargo, tampoco ey Wever a pone un linea absoluto.

E intercambio riba Noticiacla LIVE a laga un diferencia politico cla entre tono di e dos miembronan prominente di FUTURO. Croes a presenta acuerdo di gobernacion como un limite cu por determina supervivencia di Gobierno. Wever ta confirma e compromiso cu HOFA, pero ta evita declara cu desacuerdo automaticamente ta significa fin di coalicion.

Y precisamente ey ta keda e pregunta cu Laclé no a laga bai: si HOFA ta un parti fundamental di acuerdo di gobernacion, cuanto espacio realmente tin pa un minister of un partner di coalicion para contra dje sin pone e Gobierno mes na peliger? Potret di archivo di Noticiacla.