R4V: Aruba tin 11.470 refugiado y migrante Venezolano

ORANJESTAD – Aruba ta aparece cu un estimacion di 11.470 refugiado y migrante Venezolano den e ultimo actualisacion regional publica na augustus 2026 pa plataforma R4V, e mecanismo interagencial pa refugiado y migrante for di Venezuela. E cifra ta pone Aruba entre e paisnan y territorionan di Caribe cu un presencia significante di Venezolanonan.

Segun e informe, na nivel di America Latina y Caribe tin aproximadamente 6,98 miyon refugiado y migrante Venezolano. Colombia ta hospeda e grupo mas grandi cu alrededor di 2,84 miyon, sigui pa Peru cu 1,63 miyon y Brazil cu casi 800.000.

Den Caribe, Republica Dominicana ta aparece cu 99.700, Guyana cu 28.300, Trinidad y Tobago cu 26.400, Aruba cu 11.500 den e mapa redonda, y Corsou cu 6.900.

Un punto importante ta cu e cifra specifico pa Aruba no ta un conteo nobo di 2026. E tabla tecnico di R4V ta indica cu e cifra di 11.470 pa Aruba ta basa riba informacion di mei 2024, mientras cu algun otro pais tin datonan mas reciente.

R4V mes ta aclara cu e cifranan ta basa principalmente riba datonan comparti pa gobiernonan anfitrion, y cu nan no necesariamente representa registro individual di cada persona. E cifranan por inclui estimacion y por cambia segun metodologia y actualisacion di cada pais.

Na nivel regional, e total a subi di 6.963.782 pa 6.978.009, un aumento neto di 14.227 persona compara cu e actualisacion anterior.

Pa Aruba, e informe ta confirma nuevamente e peso cu migracion Venezolano tin den realidad demografico di isla, pero al mes momento e antiguedad di e cifra local ta mustra cu mester interpreta e dato cu cautela mientras no tin un actualisacion mas reciente.