ACF ta genera ya 61% di su entrada mes; total subi na Afl. 10,2 miyon

ORANJESTAD – Aruba Conservation Foundation (ACF) a cerra 2025 cu mas di Afl. 10,2 miyon na entrada, casi 10% mas cu un aña prome. E dato mas notable ta cu alrededor di 61% di tur entrada a wordo genera pa e fundacion mes, principalmente via entrada pa Parke Nacional Arikok.

E entrada genera pa ACF mes a subi na mas di Afl. 6 miyon, un aumento di mas di 13%. E contribucion di Gobierno, via management fee, tabata casi Afl. 3,6 miyon, mientras donacionnan a aporta mas di Afl. 930.000.

Un parti importante di e crecemento a bin for di e aumento den prijs di entrada pa e areanan natural. E entrada di bishitantenan a subi cu casi Afl. 716.000 te cerca di Afl. 6 miyon. Segun ACF, e aumento di prijs di day pass solamente a genera aproximadamente Afl. 631.000 extra.

Sinembargo, e cantidad di bishitante no a crece na mesun ritmo. ACF a registra cerca di 196.000 bishitante na 2025, un aumento di 2,5%, mientras turismo total na Aruba a crece mas di 7%. Como resultado, e porcentaje di turista alcanza pa ACF a baha di 7,7% pa 7,3%.

Na mes momento, gastonan operacional a subi casi 20% te mas di Afl. 5 miyon. Gastonan di personal y conservacion tambe a subi, loke a laga resultado prome cu impuesto cerca di Afl. 3 miyon, casi 9% menos cu un aña prome.

ACF a sigui fortalece su reserva financiero, cu su calamiteitenreserve subi na casi Afl. 3 miyon. E fundacion ta sigui busca manera pa bira menos dependiente di un solo fuente di ingreso, incluyendo actividadnan nobo pa bishitante, un café y un tienda di souvenir na centro di bishitante di Parke Nacional Arikok.

Fuente: Aruba.nu