Dos detencion na Corsou den caso di asesinato di hoben di 19 aña

WILLEMSTAD – Polis na Corsou a detene dos persona den conexion cu asesinato di Roshon Giselo De San Valente Giovany Dortalina, un hoben di 19 aña cu a wordo tira morto na Weg naar Welgelegen diahuebs.

Segun informacion di Polis, e incidente a cuminsa cerca 1:30 di merdia despues cu un discusion entre dos hoben di 19 aña a escala den un bringamento. Durante e confrontacion, un di nan supuestamente a busca un arma di candela for di su auto y a tira riba e victima, cu a wordo alcanza na pechu. E victima a core pa otro banda di caminda, caminda el a cai y posteriormente a wordo declara morto.

Menos cu un ora despues, Polis a logra identifica y detene e sospechoso principal, Q.M.A.L., tambe di 19 aña. Segun Polis, imagen di camara di seguridad a yuda reconstruí loke a pasa y identifica e supuesto autor.

Investigacion a sigui cu entrada hudicial na Brievengat y Seru di Mahuma. Durante e operacion, Polis a haya y confisca un arma di candela den un casita den cura di un cas no habita.

Un di dos persona tambe a wordo detene. Segun informacion preliminar, e persona aki supuestamente tabata yudando e sospechoso principal pa hui for di Corsou. E caso ta sigui bou investigacion.