Personal di seguridad na Schiphol ta anuncia accion laboral

SCHIPHOL - Personal di seguridad di Securitas, I-SEC y Trigion na aeropuerto Schiphol na Hulanda ta prepara interupcion cortico di trabou y accion di ‘stiptheid’, despues cu un ultimatum di sindicatonan CNV y FNV a vence sin un reaccion concreto.

E sindicatonan ta exigi miho condicion di trabou, incluyendo roster miho, pauze normal y mas seguridad durante dianan liber. Segun nan, presion riba personal a aumenta despues cu cantidad di compania di seguridad na Schiphol a baha di cinco pa tres, mientras absentismo pa enfermedad ta keda halto.

E prome accionnan por tuma luga ainda e luna aki y lo wordo anuncia solamente algun ora prome. CNV ta indica cu e ta keda habri pa dialogo, pero si no bin compromiso concreto, sindicatonan no ta exclui posibilidad di welga.