BCA: 9 di cada 10 consumidor na Aruba por cumpra menos

ORANJESTAD – Confianza di consumidor na Aruba a mehora ligeramente den di dos kwartaal di 2026, pero e sentimiento ta sigui claramente negativo. Nuebe di cada diez consumidor ta bisa cu nan por cumpra menos cu mesun entrada compara cu seis luna pasa.

Segun e ultimo Consumer Confidence Survey di Banco Central di Aruba (BCA), indice di confianza a subi aproximadamente un punto pa casi 94. Un nivel di 100 ta considera neutral.

Problema principal ta poder di compra: 90% ta indica cu nan placa ta rindi menos, mientras mas di 90% ta spera cu prijsnan lo sigui subi den e proximo seis luna. Casi mitar di consumidor ta spaar menos y casi tres di cada dies no ta spaar absolutamente nada.

Casi mitar di hogar ta indica cu nan situacion financiero a deteriora durante ultimo seis luna. Ademas, mayoria ta cauteloso cu gasto grandi: casi dos tercera parti no ta considera esaki un bon momento pa tuma un hipoteca, cerca di 60% ta pensa mescos tocante otro prestamo y mas di mitar no ta mira esaki como un bon momento pa cumpra auto.

Aunke pesimismo a baha un poco, confianza di consumidor ta keda hopi atras di confianza empresarial, cu segun BCA a aumenta den mesun kwartaal.