MEP ta exigi reunion urgente tocante declaracion di Gerlien Croes riba HOFA

ORANJESTAD – Fraccion di Movimiento Electoral di Pueblo (MEP) a solicita cu urgencia, un reunion publico di Parlamento pa Minister Gerlien Croes duna claridad tocante declaracionnan cu el a haci riba e Rijkswet HOFA y acuerdonan interno di coalicion.

Den un carta fecha 18 di augustus 2026 y dirigi na Presidente di Parlamento, Marlon Sneek, MEP ta indica cu declaracionnan di Croes di 17 di augustus ta lanta pregunta importante tocante naturaleza y contenido di acuerdonan haci entre partidonan di coalicion.

Segun e carta, Croes a declara publicamente cu ora un partido postula un candidato pa minister, e candidato ta bira parti di Gobierno y tin un acuerdo cu su propio partido, pero cu na mes momento tin cu respeta e acuerdo di gobernacion. E minister a agrega cu si tin discrepancia riba esaki, mester wak con pa sigui mantene e acuerdo di gobernacion.

Pa MEP, e declaracion aki ta specialmente relevante den cuadro di Rijkswet HOFA y e posible consecuencianan si un partido di coalicion no kier of no por sigui cumpli cu acuerdonan haci.

E fraccion opositor ta pidi Minister Croes pa splica concretamente cua acuerdonan a wordo haci den acuerdo di gobernacion of entre e partidonan di coalicion relaciona cu Rijkswet HOFA.

Ademas, MEP kier sa kico Croes tabata kier bisa ora el a indica cu caymento di un acuerdo asina por nifica cu “no tin Gobierno mas”, y con e tipo di acuerdo aki ta relaciona cu responsabilidad individual di cada minister y cu responsabilidad independiente di Parlamento.

MEP ta considera e asunto di importancia grandi tanto pa sociedad como desde punto di bista constitucional, y p’esey ta pidi pa e reunion publico wordo agenda cu urgencia y pa Minister Croes wordo invita pa duna explicacion.

E solicitud ta firma pa parlamentario Evelyn Wever-Croes, Edgard Vrolijk y Rocco Tjon.