Elvis Tromp ta duna mural di Sunrise City color nobo despues di 12 aña

SAN NICOLAS – Despues di 12 aña, e artista Arubiano Elvis Tromp ta bolbe traha riba e mural cu el a crea na entrada di San Nicolas na 2014, un obra originalmente encarga pa Aruba Tourism Authority (ATA) pa representa hospitalidad, amabilidad y cultura Arubiano.

E mural, diseña completamente pa Tromp, ta combina paisahe di Aruba, cadushi, sero, turista y escenanan di hospitalidad. Na e tempo ey, San Nicolas tabatin poco mural artistico y e obra rapidamente a bira un punto di interes pa local y turista, cu tabata para pa admira y saca potret.

Awor, 12 aña despues, e mural ta haya un retouch cu aporte di ATA, impulsa pa Minister di Turismo, Transporte y Labor Wendrick Cicilia. E restauracion tambe ta conecta cu e vision pa revitalisa Bernhardstraat y San Nicolas.

Pa Tromp, e renovacion tin un significado special: e ta mira  atrobe cu hende ta para, admira y fotografia su obra. E mural cu a nace como un regalo pa comunidad ta recupera su color, den man di e mesun artista cu a diseñ'e y pint'e na 2014.