Corsou ta enfrenta situacion delica di coriente; 4 mashin ta for di servicio

WILLEMSTAD – Situacion di suministro di coriente na Corsou ta keda delica, segun Aqualectra. Durante e temporada di calor, e demanda di electricidad riba e isla por subi te 140 megawatt (MW) pa dia, mientras cu cuater di e mashinnan di produccion actualmente ta for di servicio pa problema tecnico.

Normalmente Aqualectra tin capacidad pa produci te 150 MW, pero cu e cuater mashinnan afo, capacidad disponible a baha pa solamente 100 MW. Como consecuencia, Corsou ta depende fuertemente di energia genera pa molinanan di biento pa cubri e demanda.

E isla tin 70 MW di capacidad instala na energia di biento, pero produccion por varia drasticamente y tin momento cu e ta baha te bou di 10 MW. Baterianan cu capacidad di 25 MW por compensa temporalmente, pero e reserva ey tambe por caba.

Esaki a pasa diasabra ultimo, ora biento a baha mas lihe cu proyecta y energia den e baterianan a caba mas trempan. Como consecuencia, varios bario na Corsou a cuminsa perde coriente alrededor di 2:30 di atardi.

Aqualectra ta spera pieza necesario den e proximo simannan pa por drecha e cuater mashinnan y pone nan bek den produccion. Te e momento ey, e compania ta sigui monitorea situacion di coriente na Corsou di cerca.