Yiu di Curaçao a fayece den explosion na refineria na Rotterdam

WILLEMSTAD/ROTTERDAM – NoticiaCla ya a informa anteriormente tocante e explosion cu a tuma luga diabierna 13 di augustus riba tereno di Gunvor Energy den haf di Rotterdam. Awor tin informacion adicional tocante e victima fatal: ta trata di David Casildo Naar, conoci como “Rexy”, un yiu di Curaçao di 60 aña.

Segun informacion di famia, Naar tabata forma parti di un grupo di seis persona contrata pa traha den un tanki na e refineria. Tres inspector lo a controla e tanki y indica cu e tabata liber di gas y sigur pa cuminsa e trabou. Sinembargo, poco despues cu Naar a yega cerca e tanki, un explosion fuerte a tuma luga.

Naar a fayece mesora. Otro coleganan cu tabata un poco mas leu a logra scapa, aunke algun a resulta cu quemadura.

Rexy a nace dia 9 di april 1966 na Curaçao y tabata biba na Hulanda pa aproximadamente 31 aña, unda e la traha durante hopi aña den sector di refineria. E ta laga su casa, yiu y demas famia atras.

E explosion a tuma luga alrededor di 11:30 di mainta, ora di Hulanda, riba tereno di Gunvor Energy na Moezelweg den haf di Rotterdam. Autoridad laboral Hulandes ta considera e suceso un accidente di trabou y lo investiga exactamente kico a pasa.

Entiero di Rexy ta programa pa diahuebs na Hulanda, mientras famianan for di Curaçao ta prepara pa biaha pa asisti na su despedida.