Protesta agricultor contra retiro di permiso di cinco productor di galiña na Hulanda

DEN BOSCH -  Centenares di agricultor a protesta dilanti edificio di provincia Noord-Brabant na Den Bosch contra e plan pa retira permiso di cinco productor di galiña. Segun gobierno provincial, e empresanan ta causa demasiado emision di nitrogeno cu ta afecta naturaleza den cercania, mientras nan plannan pa reduci e emision no ta suficiente.

E decision ainda no ta definitivo. Parlamento provincial a bolbe for di receso pa debate e asunto, despues di peticion di varios partido di oposicion. Organisacionnan agricola manera LTO, ZLTO y Farmers Defense Force a organisa e protesta, mientras hopi agricultor ta preocupa cu nan propio permiso por corre e mesun riesgo.

E caso ta resultado di un lucha hudicial di varios aña entre organisacionnan ambiental, provincia y e productornan. Minister di Agricultura di Hulanda a bisa cu Gobierno kier haci tur loke ta posibel pa evita retiro di e permisonan y considera cu e cinco productor mester haya oportunidad pa presenta plan nobo pa limita nan emision.

Durante e protesta tabatin tambe atencion pa un accidente serio riba autopista A59, unda dos persona a muri y seis a resulta herida. Segun ANWB, e accidente a sosode na final di un fila di trafico forma mientras tractor tabata circula riba autopista. Polis ta investiga e causa exacto.