Un morto y varios herido despues di explosion den haf di Rotterdam

ROTTERDAM - Un explosion na un compania den haf di Rotterdam a causa morto di un persona y a laga varios otro herida. E incidente a tuma lugar rond di 11:30 di mainta riba terreno di Gunvor Energy, un refineria y terminal di combustible na Moezelweg.

Segun e compania, un grupo externo di mantenemento tabata trahando cu varios tubo cerca di e tankpark ora algo aparentemente a bay malo durante desconexion di e tubonan. E explosion a causa daño visible na un tank di almacenamento.

Polis a confirma e morto, pero ainda no a duna mas informacion tocante identidad di e victima ni cantidad exacto di heridonan.

Mas trempan e mesun dia tabatin un fayo di coriente den e mesun area, cu a obliga un refineria grandi di ExxonMobil pa para tur su proceso temporalmente y kima gas mediante su sistema di flare. Un cas di transformador tambe a pega candela posiblemente como consecuencia di un pico di coriente.

Havenbedrijf Rotterdam a aclara cu e corte di coriente y e explosion na Moezelweg no tin relacion cu otro.