De la Espriella ta anuncia prome golpi contra gruponan arma na Colombia

BOGOTA – Presidente nobo di Colombia, Abelardo de la Espriella, a anuncia su prome resultadonan operacional contra gruponan arma ilegal, apenas dos dia despues di a asumi poder. Seis integrante di diferente organizacion criminal a muri durante operacionnan na Meta y Antioquia.

E operacion principal a tuma luga na Mapiripan, Meta, unda Forza Publico a elimina alias Ruso of Aleman, cabecilla di Frente 28 di disidencianan di FARC bao direccion di alias Ivan Mordisco. Otro tres integrante di e grupo a muri durante e mesun operacion.

Na Anori, Antioquia, dos integrante di Clan del Golfo a muri den combate, entre nan un cabecilla. Autoridadnan a confisca seis fusil y cantidad grandi di material di guera. Ademas, cuater supuesto integrante di Clan del Golfo a wordo deteni na Necocli.

De la Espriella a presenta e resultadonan como señal cu su gobierno lo adopta un posicion firme contra gruponan arma ilegal y cu seguridad lo ta un di e prioridadnan central di su administracion.