Gobierno ta amplia ayudo financiero pa famianan cu menos recurso

ORANJESTAD – Gobierno AVP-FUTURO diabierna a anuncia varios aumento den asistencia social, cu enfoke special riba famianan cu menos recurso y e gastonan relaciona cu inicio di aña escolar nobo. Segun Prome Minister Mike Eman y Minister di Asunto Social Mervin Wyatt-Ras, e medidanan ta parti di un plan mas amplio pa combati pobresa y fortalece poder di compra.

BIJSTAND BASICO 

Bijstand basico ta keda aumenta di Afl. 450 pa Afl. 600 pa luna. Pa aña escolar, schooltoeslag anual ta subi di Afl. 250 pa Afl. 300 pa mucha, cu un maximo di Afl. 1.100 pa famia. Contribucion pa schoolgeld ta aumenta di Afl. 120 pa Afl. 250 pa mucha, mientras ayudo pa articulonan escolar ta subi di Afl. 250 pa Afl. 300 pa mucha, cu un maximo di Afl. 1.000 pa famia.

Gobierno ta enfoca tambe riba pensionadonan, personanan cu limitacion y trahadornan cu salario minimo. Anteriormente AOV a aumenta cu Afl. 500 pa pensionado soltero y Afl. 900 pa pensionadonan casa, mientras beneficio pa personanan cu limitacion a aumenta cu Afl. 100 pa luna entrante 1 di augustus. Ademas, Gobierno ta finalisando un concepto di ley pa crea un beneficio financiero structural pa famianan cu mucha cu necesidad special. E propuesta, cu segun Gobierno por yuda miles di famia cu gastonan manera terapia, tratamento y medicacion, ta den su fase final di revision legal y ta programa pa bay Parlamento dentro di algun siman.

SALARIO MINIMO

Pa trahadornan cu salario minimo, Gobierno ta prepara un proyecto di ley pa aumenta salario minimo gradualmente cu Afl. 500 den tres aña. Segun Eman, e aumento lo wordo implementa paso a paso, teniendo cuenta cu capacidad di empresanan, specialmente negocionan chikito.

Gobierno ta pidi famianan cu ta pensa cu nan por cualifica pa e diferente beneficionan pa acudi na Departamento di Asunto Social pa mas informacion.