Opinion: Articulo 38 no ta kita autonomia di Aruba

Autor conoci cerca redaccion

Mirando tur e discushon cu tin awe, tin un di e parlamentarionan cu a tuma su tempo pa lesa e wetsvoorstel.

Ayera mi a tende un politico grita cu HOFA ta mishi cu nos Constitucion. E ta bisa cu articulo 38 ta mina nos autonomia.

Pero, e a lesa articulo 38?

E articulo aki a wordo inclui precisamente pa garantiza cu Aruba no ta bolbe haci loke a pasa den pasado, ora a purba laga e situacion sali for di control y pone Hulanda den un posicion dificil, mientras cu Hulanda ta esun cu ta exigi garantia cu e lo ricibi su plaka bek.

E articulo aki ta referi claramente na e acuerdo di maneho financiero. Tambe ta stipula cu, si Aruba kier bin cu un iniciativa nobo tocante e acuerdo ey, esey lo mester pasa den e Reino Ministerraad (RMR). Esaki no ta mina Aruba su autonomia.

Parlamentarionan di Aruba mester siña actua cu madures y responsabilidad. Un momento nan kier tuma tur responsabilidad pa nan mes, aunke nan a demostra cu no semper nan por maneha e situacion. Otro momento nan kier hasi manera un mucha cu ta busca e proteccion di mama pa haya placa.

Nan tin un boca grandi pa bisa cu Hulanda no tin derecho di mishi den asuntonan interno di Aruba, pero na mes momento nan mes ta mishi den asuntonan interno di Hulanda, criticando con un mucha malcria cu Hulanda ta duna otro paisnan placa y Aruba mester paga bek.

No ta Aruba ta dicidi con Hulanda kier gasta su placa. Y si Aruba a firma un acuerdo pa paga e placa bek, awor no por bin yora.

Hulanda a bisa cu e ta trata tur isla igual. Nunca e la bisa cu tur isla lo keda bou mesun condicion.

Atrobe, algun parlamentarionan ta pone pueblo di Aruba den berguensa. Nan tin titulo, pero nan no ta lesa ni comprende loke ta skirbi na Hulandes.

Hopi tristo.

Sigui hunga malcria te ora Hulanda bisa: "Awor ta basta. Busca boso mes solucion." Si realmente boso ta kere cu boso sa tur cos miho, e ora mester acepta e responsabilidad tambe. Pero probablemente, hasta esey tampoco lo ta bon.

Bo mes lesa articulo 38 di HOFA. Lo bo mira cu hopi di esnan cu ta grita, of no ta comprende Hulandes, of ta malinforma pueblo conscientemente pa sigui hustifica nan propio mal maneho.