Analisis: Kico un boycot di UEFA contra FIFA kier men pa mundo di futbol

Scirbi pa Tito Laclé  

Un posible boycot di UEFA contra FIFA manera anuncia, lo tin consecuencianan enorme pa futbol mundial. Laga mi ta mas specifico.Si e federacion europeo sigui cu su amenaza, e 55 federacionnan nacional cu ta forma parti di UEFA lo no participa mas den torneo of actividadnan oficial di FIFA te ora e organizacion mundial laga su plan pa permiti inversionistanan privado bira copropietario di actividadnan comercial relaciona cu su competencianan. E boycot aki ta benefia NOS si.. y mi lo splica con..

Segun UEFA, e medida no ta un protesta simbolico, sino un paso cu por cambia e panorama di futbol internacional completamente.

Si e boycot bira realidad, e por nifica cu seleccionnan europeo lo no participa den e Mundial masculino ni femenino, ni den rondanan clasificatorio si e conflicto sigui amplia. Tambe, oficialnan di futbol di Europa lo no asisti na reunionnan y comitenan di FIFA, y por no colabora mas cu eventonan, gobernacion y actividadnan comercial di e federacion mundial.

Pa hungadornan manera Kylian Mbappe, Jude Bellingham, Erling Haaland, Lamine Yamal y Harry Kane, esey por significa cu nan lo no por representa nan pais den torneo organiza pa FIFA mientras nan federacion nacional participa den e boicot.

TORNEONAN DI UEFA LO SIGUI NORMALMENTE

E conflicto no ta afecta futbol di club den Europa. Competencianan manera UEFA Champions League, Europa League, Conference League y e Campeonato Europeo (EURO) ta organiza directamente pa UEFA y, pa e motibo ey, lo sigui manera programa.

MUNDIAL LO PERDE GRAN PARTI DI SU FUERZA

Aunke FIFA por sigui organiza un Mundial sin Europa, hopi experto ta considera cu e torneo lo perde gran parti di su prestigio y atraccion.

Europa actualmente aporta cu 16 di e 48 seleccionnan cu ta participa den e Mundial, incluyendo hopi di e mihor equipo nacional di mundo. Ademas, e continente ta representa un porcentahe importante di audiencia televisivo y di e ingreso comercial cu e torneo ta genera.

Un Mundial sin paisnan europeo tecnicamente lo sigui ta un Mundial di FIFA, pero pa hopi fanatico y specialista, e competencia lo perde hopi di su balor deportivo y comercial.

Y awor pa e parti mas interesante pa nos region!

Un posible boycot di UEFA contra FIFA no solamente lo sacudi futbol europeo, sino tambe por cambia futuro di futbol den Caribe. Pa Aruba y Corsou, e conflicto entre e dos organisacionnan mas grandi di futbol mundial por representa un oportunidad historico, mientras cu tambe ta crea incertidumbre riba e futuro di e deporte.

UEFA a amenaza cu retira su 55 federacionnan miembro for di tur torneo y actividad oficial di FIFA si e federacion mundial sigui cu su plan pa permiti inversionistanan privado bira copropietario di e actividadnan comercial di su competencianan.

MAS OPORTUNIDAD PA ARUBA Y CORSOU

Si Europa no participa den competencianan di FIFA, e organisacion mundial lo mester redistribui e cuponan pa Mundial. Actualmente Europa tin 16 di e 48 puesto disponible.

Expertonan ta considera cu algun di e puesto extra por wordo asigna na otro confederacionnan, incluyendo Concacaf. Esaki por aumenta   e oportunidad pa seleccionnan manera Aruba y Corsou clasifica pa un Mundial considerablemente.

Ironicamente, un conflicto cu ta pone futbol mundial bou presion por bira e mihor oportunidad historico pa paisnan chikito den Caribe.

CORSOU Y ARUBA POR ENFRENTA DECISION POLITICO

Aunque UEFA por boycotea FIFA, e no tin autoridad riba Concacaf. Aruba y Corsou no ta obliga pa sigui e boycot.

Sinembargo, si e conflicto bira mas grandi, federacionnan den Caribe por haya nan mes den medio di un discusion internacional entre FIFA y UEFA. Pa awor, e expectativa ta cu mayoria di paisnan di Concacaf lo sigui participa den torneo di FIFA, salvo si Concacaf mes cambia di posicion.

MUNDIAL LO PERDE HOPI DI SU PRESTIGIO

Un Mundial sin Europa lo sigui existi, pero lo no ta mescos.

Paisnan manera Francia, Hulanda, España, Alemania, Inglaterra, Portugal, Italia y Belgica ta forma parti di e mehor seleccionnan di mundo. Sin nan participacion, hopi fanatico y  specialista ta kere cu e torneo lo perde gran parti di su balor deportivo.

Pa Aruba of Corsou, clasifica lo sigui ta un logro historico, pero inevitablemente lo surgi pregunta si un Mundial sin Europa tin e mesun prestigio.

MENOS ENTRADA FINANCIERO PA FUTBOL

Europa ta representa un porcentahe hopi grandi di e audiencia televisivo, patrocinadornan y entrada comercial di FIFA.

Si un boycot causa cu ingreso di FIFA ta baha, e federacion mundial por tin menos placa disponible pa programanan di desaroyo di futbol.

Esaki por afecta proyecto di infrastructura, entrenamento di entrenadornan, desaroyo di arbitronan y programa jubenil den paisnan manera Aruba y Corsou, cu regularmente ta beneficia di financiamiento di FIFA.

MENOS OPORTUNIDAD PA HUNGA CONTRA EUROPA

Un otro efecto por ta cu seleccionnan di Aruba y Corsou ta haya menos oportunidad pa hunga partido amistoso contra paisnan europeo.

Si UEFA y FIFA keda den conflicto, colaboracion internacional por bira mas limita, reduciendo e posibilidad pa medi fuerza contra algun di e mehor seleccionnan di mundo.

BONEIRO CASI NO TA AFECTA

Boneiro ta den un posicion diferente. E isla ta miembro di Concacaf, pero no di FIFA.

Esaki ta significa cu Boneiro no por clasifica pa Mundial, cu of sin boiycot. E impacto pa Boneiro lo ta principalmente indirecto, door di eventual cambionan den competencianan regional.

BENEFICIO OF PERHUICIO?

A corto plazo, Aruba y particularmente Corsou por haya un oportunidad mas grandi pa clasifica pa Mundial.

Pero a largo plazo, expertonan ta bisa cu futbol den Caribe ta beneficia mas di un FIFA financieramente fuerte y un sistema mundial uni. Un conflicto prolonga entre FIFA y UEFA por crea mas problema cu beneficio pa futbol den region.