Señora di 84 aña ta bira e di 9 victima fatal den trafico e aña aki

ORANJESTAD – Un accidente di trafico na Seroe Blanco a cobra un otro bida, despues cu un muher di 84 aña a sucumbi na su heridanan. Cu esaki, e cantidad di victimanan fatal den trafico na Aruba durante 2026 a subi pa nuebe.

E accidente mes a sosode diadomingo alrededor di 4:30 di atardi, ora un Ford Fusion blanco a dal contra un pilar di un cas na Seroe Blanco. Polis y ambulancia a acudi na e sitio, unda nan a brinda e chauffeur e prome asistencia prome cu transport'e cu urgencia pa hospital.

Dialuna mainta, Polis di Trafico a confirma cu e victima, Olga Denise Lampe, naci  na Aruba riba 10 di april 1942, a fayece como consecuencia di e heridanan sufri.

Polis di Trafico ta sigui investigando e causa exacto di e accidente. Cuerpo Policial Aruba a expresa su sincero condolencia na famia di e fayecido.