Tres sospechoso deteni despues di tiramento mortal na Santa Cruz

SANTA CRUZ – Team di Recherche di Santa Cruz a detene tres sospechoso den investigacion di e caso di tiramento cu a tuma bida di Rayson E. Kelly diarason anochi na parkeerplaats di Stadion Nadi Croes/Crismo Angela.

Segun informacion oficial, e investigacion a progresa rapidamente y a resulta den detencion di dos homber y un muher. E sospechosonan ta W.R.D.T. (23), A.K.M. (32) y J.M.L.G. (31), tur naci na Aruba.

Polis no ta descarta cu mas detencion por sigui mientras e investigacion ta continua.

Cuerpo Policial Aruba ta haci un apelacion na cualkier persona cu tin informacion of cu a mira algo relaciona cu e caso pa yama e Tipline di Polis na 11141. Tur informacion lo wordo trata confidencialmente y e informante por keda anonimo. NOTA: E potret ta uno crea pa acompaña e articulo y no necesariamente ta trata di e tres personanan specifico.