Tiramento na Santa Cruz ta cobra bida di hoben di 16 aña

ORANJESTAD – Un hoben di 16 aña a perde su bida diaranson anochi despues di un tiramento riba parkeerplaats di Stadion Nadi Croes/Crismo Angela na Santa Cruz.

Segun informacion di Cuerpo Policial Aruba, polis a ricibi e notificacion pa mas o menos 9:55 di anochi y a despacha diferente patruya y un ambulancia pa e sitio.

Ora polis a yega, nan a haya e hoben cu un herida di bala y sin reaccion. Personal medico a brinda e prome asistencia y a transporta e victima cu maximo urgencia pa hospital, mientras polis a sera diferente caminda pa facilita e transporte. Poco despues a confirma cu e hoben a fayece.

E victima a wordo identifica como Rayshon E. Kelly, naci na Aruba riba 1 di oktober 2009.

Segun e prome investigacion, e hoben tabata riba un brommer hunto cu un otro persona ora un auto cu tres homber aden a pasa y a habri candela. E hoben a wordo herida fatalmente.

Departamento di Recherche y BFTO a cuminsa un investigacion amplio riba e caso. Slachtofferhulp tambe a wordo activa pa brinda apoyo na e afectaonan.

Cuerpo Policial Aruba a expresa nan condolencia na famia di Rayshon E. Kelly y ta pidi cualkier persona cu tin informacion of cu a mira algo relaciona cu e tiramento pa yama e tipline di polis na 11141. Informacion por wordo entrega anonimamente.

E investigacion ta sigui den pleno progreso.