Van der Burg: Aruba ta duna bon ehempel di cooperacion

ORANJESTAD – Secretario di Estado Eric van der Burg a bisa cu Aruba ta mustra con hopi por logra ora gobierno, organisacionnan y comunidad ta traha hunto cu un vision pa futuro. Esaki e la declara den fin di siman despues di a bishita Aruba anteriormente. Durante su bishita na Aruba, e la reuni cu Gobernador Alfonso Boekhoudt, Prome Minister Mike Eman, Minister Gerlien Croes y Minister Geoffrey Wever pa papia tocante e desaroyonan actual y cooperacion den Reino Hulandes.

Van der Burg tambe a bishita varios organisacion cu ta contribui na desaroyo di Aruba. Na Tierra del Sol, huntu cu Aruba Birdlife Conservation, e la mira e trabounan pa proteha e shoco. Na Ecotech Aruba, e la tende mas tocante sostenibilidad y reciclahe, mientras cu Crisis Management Office a mustra e importancia di cooperacion regional, entre otro den e asistencia reciente na Venezuela.

Na Universidad di Aruba, e secretario di estado a conoce  studiantenan di Kingdom Startup Program for di Aruba, Corsou y Sint Maarten, mientras cu na Vaper Trading e a wak con e programa BMKB-ACS ta yuda empresario local crece y inverti.

Van der Burg a bisa cu e ta bai bek Hulanda cu hopi impresion positivo y cu confianza den e futuro di cooperacion dentro di Reino.