Spaña ta Campeon Mundial despues di gol decisivo di Ferran Torres

NEW JERSEY - Spaña a conkista su di dos título mundial di futbol despues di gana Argentina 1-0 den tempo extra na New York New Jersey Stadium. Despues di 120 minuut di futbol intenso, Ferran Torres a bira e heroe di e final cu un gol na e minuut 106, asegurando un victoria mereci pa La Roja.

For di e cuminsamento, Spaña tabata e ekipo cu a domina e partido. Cu hopi posesion di bala, pasenan rapido y un preshon halto, e ekipo di Luis de la Fuente a pone Argentina bou di preshon durante casi henter e partido. Lamine Yamal tabata un di e hungadornan mas peligroso, creando varios oportunidad y obligando e portero argentino Emiliano Martínez pa hasi varios salbamento importante.

SPAÑA NO A STÒP DI ATACA

Durante e di dos mitar di e partido, Spaña a sigui domina. Dani Olmo, Pedri, Pau Cubarsí, Ferran Torres y Yamal tur a purba Martínez, kende a mantene Argentina den e partido cu un serie di salbamento importante. Diw otro banda, Argentina casi no por a crea peligro den atake, mientras cu Spaña sigui controlando e partido.

E CARCHI CORA A CAMBIA E FINAL

Den e tempo añadi di e di dos mitar, Argentina a keda cu dies hungado despues cu Enzo Fernández a ricibi su di dos carchi hel y un carchi cora pa un falta riba Pau Cubarsí. E expulsion a pone mas preshon riba Argentina den e tempo extra.

FERRAN TORRES A DUNA SPAÑA E COPA MUNDIAL

Den e minuut 106 di tempo extra, Spaña finalmente a kibra e resistencia argentino. Pedro Porro a manda un bala perfecto, Nico Williams a cabecia e bala bek y Ferran Torres a remata cu un tiro fuerte den e parti ariba di e gol  pa pone Spaña dilanti 1-0.

E gol a crea un gran celebracion den henter e stadion, cu Spaña defendiendo cu hopi disciplina pa mantene e bentaha.

ARGENTINA A SIGUI LUCHA TE E ULTIMO SECONDE

Apesar cu nan tabata cu un hungado menos, Argentina no a entrega. Lionel Messi a sigui intenta y crea peliger cu tiro liber y cornernan. Den e ultimo minuutnan, Giuliano Simeone a haña e miho oportunidad pa empata, pero su remate a pasa ariba di e gol.

Despues di e pitazo final, Leandro Paredes tambe a ricibi un carchi cora, poniendo punto final na un partido di hopi intensidad.

Spaña a defende cu caracter te e ultimo seconde y a hiba e Copa Mundial pa di dos biaha den su historia, despues di e título di 2010.