Gobierno ta amplia financiamiento pa empresanan local

ORANJESTAD – Gobierno di Aruba a marca un paso importante den apoyo na comercio local cu e entrega di e prome prestamo bou di e programa BMKB-ACS, den colaboracion cu Qredits. Durante un bishita na Vaper Trading VBA hunto secretario di estado hulandes Eric vd Burg, Minister Geoffrey Wever a destaca cu e iniciativa ta haci financiamiento mas accesibel pa empresanan cu tin potencial, pero cu ta enfrenta dificultad pa haya credito tradicional.

E programa ta ofrece garantia parcial riba prestamonan, reduciendo e riesgo pa institucionnan financiero. Vaper Trading lo uza e financiamiento pa amplia su operacionnan. Segun Wever, e colaboracion entre gobierno, sector financiero y empresario ta esencial pa crea mas trabou, stimula inversion y diversifica economia di Aruba.