Minister Croes: Maximo 24 alumno pa klas ta keda vigente

ORANJESTAD – Ministerio di Relacionnan den Reino, Educacion, Hubentud, Innovacion y Deporte lo sigui aplica e norma cu limita e cantidad di alumnonan na un maximo di 24 pa klas durante e aña escolar 2026-2027. E maneho, introduci na 2025-2026, tin como meta mehora e calidad di enseñansa y baha e carga di trabou riba docente.

Segun minister Gerlien Croes, klasnan mas chikito ta permiti maestronan duna mas atencion individual na cada alumno, adapta miho na nan necesidadnan y crea un ambiente di siñamento mas efectivo. Ministerio ta spera cu e medida tambe lo contribui na un miho bienestar y satisfaccion laboral di personal educativo, cu finalmente lo refleja den miho resultado academico pa e alumnonan.

Ministerio ta recorda cu e ley tambe ta stipula un minimo di 16 alumno pa klas, pa asina mantene un uso eficiente di recursonan y promove un ambiente social y educativo balancea.

Directivanan di scol ta wordo solicita pa aplica e norma di 16 te 24 alumno manera mas exacto cu ta posibel, teniendo cuenta cu capacidad di e scol y e disponibilidad di personal. Den situacionnan excepcional, Ministerio ta dispuesto pa dialoga cu e scolnan pa busca solucionnan practico.

Ministerio ta confirma cu lo sigui traha huntu cu directivanan di scol, Directie Onderwijs y Dienst Inspectie van het Onderwijs pa fortalece un sistema educativo cu ta pone calidad di enseñansa y bienestar di alumno y docente na prome lugar.