KPA a honra promocion y hubileo di su personal

ORANJESTAD – Korps Politie Aruba (KPA) a celebra un ceremonia special na J.F.K. Education Center caminda agentenan policial y personal administrativo a ricibi decreto gubernamental, promocion di rango y reconocemento pa nan aña di servicio. E ceremonia a tuma lugar den presencia di famianan, coleganan y e mando policial, bou di liderato di Altocomisario Ramon Arnhem.

Durante e ceremonia, varios miembro di KPA a haya promocion na diferente rango, incluyendo ascenson for di Agent Eerste Klasse pa Brigadier, Brigadier pa Brigadier Eerste Klasse, Hoofdagent pa Hoofdagent Eerste Klasse, Hoofdagent Eerste Klasse pa Onderinspecteur, y Onderinspecteur Eerste Klasse pa Inspecteur. Tambe cuatro miembro di e personal administrativo a ricibi nan decreto gubernamental.

Ademas di e promocionnan, KPA a honra personal cu a dedica 30 y 35 aña di servicio na Pais Aruba. Varios agente a celebra nan 30 aña di hubileo, mientras cu un miembro di e personal administrativo a conmemora 35 aña di servicio. Tur a ricibi un plakkaat y decreto gubernamental como muestra di aprecio pa nan compromiso y dedicacion.

Den su discurso, Altocomisario Ramon Arnhem a expresa su orguyo pa tur esnan cu a ricibi e reconocimentonan. El a destaca cu e personal di KPA ta “e wes’i lomba” di e organisacion y a gradici tambe e famianan pa nan apoyo constante durante e carera di e empleadonan.