Artista Arubiano ARUCAMBA ta lansa single nobo “TAX ON LOVE” pa mercado mundial

ORANJESTAD – Artista Arubiano ARUCAMBA a lansa oficialmente su single nobo di roots reggae, “TAX ON LOVE”, cu desde awe ta disponibel mundialmente riba Spotify, Apple Music y otro plataformanan di streaming.

Segun e artista, e cancion ta uza humor y un mensaje creativo pa haci critica social. E pregunta central ta simpel: si gobierno ta pone belasting riba casi tur cos, kiko lo pasa si un dia amor tambe bira sujeto na belasting?

Cu un tono lihe y sarcastico, e cancion ta imagina situacionnan manera mester pidi permiso pa un sunchi, warda factura despues di un weekend romantico of yama Belastingdienst prome cu haci algo romantico.

Ademas di e lansamento nobo, ARUCAMBA a revela cu su musica ta haya cada biaha mas atencion internacional. Durante e ultimo lunanan, su produccionnan a wordo poni den rotacion riba diferente emisora di radio na Alemania, Jamaica, Italia, Indonesia, Africa y otro partidonan di mundo.

Aunke e artista ta sigui produci tur su musica for di su propio Backyard Studio na Aruba, su cancionnan ta yega un audiencia internacional cada biaha mas grandi.

ARUCAMBA ta indica cu e ta spera cu tambe den Aruba mas hende lo descubri su musica. Esnan cu tin interes den un entrevista, historia di fondo of conversacion radial por tuma contacto cu e artista.

English