Miho graduado di VWO a bishita Prome Minister Eman

ORANJESTAD – Evie van der Sloot, e miho graduado di VWO na Colegio Arubano, a haci un bishita na Prome Minister Mike Eman, caminda el a ricibi un placa como reconocemento pa su prestacion academico excepcional.

Durante e encuentro, Evie a comparti cu e ta prepara pa sigui su estudio di medicina na Hulanda. Su meta ta pa gana experiencia, incluyendo trabou boluntario durante su estudio, y despues bolbe Aruba pa contribui den e sector di salud.

Evie a anima otro hoben pa pone metanan cla, sigui traha duro pa logra nan, pero tambe disfruta di e diferente momentonan cu bida tin pa ofrece y aprecia Aruba.

Prome Minister Eman a felicita Evie pa su dedicacion y resultado sobresaliente, deseandole hopi exito den e siguiente etapa di su carrera academico.