Corsou ta introduci Pre-clearance pa biahe cu menor

WILLEMSTAD – Entrante diahuebs 9 di yuli 2026, Polis di Corsou ta introduci un servicio nobo di Pre-Clearance pa personanan cu ta biaha cu menor di edad. E iniciativa tin como meta pa hasi e control na aeropuerto mas rapido y efisiente.

Mayor di edad of representante legal por laga controla tur documentonan necesario prome cu e fecha di biahe. Si tur cos ta na ordu, Imigracion lo marca e documentonan oficialmente despues di e Pre-Clearance.

Riba e dia di biahe, e documentonan cu a pasa pa e Pre-Clearance por wordo mustra na aeropuerto, reduciendo e tempo di espera durante e control.

Pa haci uso di e servicio gratis aki, ta necesario presenta, segun e caso, documentonan di biahe valido, formulario pa biaha cu menor, certificado di matrimonio of extracto amplio di acta di nacemento, declaracion di autorizacion, documento di tutela y otro documentonan indica den e foyeto oficial.

E servicio ta disponible na Oficina Principal di Polis na Winston Churchillweg, di dialuna te diahuebs entre 9:00 di mainta y 1:00 di atardi, y diabierna entre 9:00 di mainta y 11:30 di mainta. E iniciativa lo keda vigente durante temporada di vakantie grandi.